2015-imi NP-p New York-imi ataatsimeersuarnerminni 2030-ip tungaanut piujuartitsinissamut anguniakkat 17-it nutaat akueraat. 2030 agendami Nunarsuarmi anguniakkat 17-it taakkut nunarsuarmut tamarmut aamma nunanut tamanut atuupput. 2030-imut anguniagassat soorunami atituujullutillu qulequtarsiornerusuupput, aammali nunarsuarmioqatigiit anguniagassatut kissataannut naleqqanik ersarissunik tunisillutik.
Anguniakkat taakkut aammattaaq ullumikkut Kalaallit Nunaannut annertuumik soqutiginaateqarput. Ilaatigut naligiissitaaneq uani pineqarpoq, meeqqat pisinnaatitaaffii, tamanut ilinniarsinnaatitaaneq, inuiaqatigiinni eqqissisimaneq aamma inatsisitigut isumannaatsuuneq, imeq, nukissat, avatangiisit silalu, akiitsoqaleriartorneq, piujuartitsilluni ineriartorneq ilanngullugu, nungutsaaliuisumik sillimmatinik atuineq, kulturikkut tamalikaassuseq, annertuumik nutarterisoqartillugu aamma inuussutissarsiornerit allanngornerini inooqatigiinnermi ataqatigiissinnaassuseq.
Anguniakkavut.gl tassaavoq nunap iluani attaveqaqatigiinnermut nittartagaq nutaaq, maani nunami nunarsuarmi anguniakkanik aamma piujuartitsilluni ineriartortsitsinermut sulinermut atugassiaq. Tassani SDG 2030 agendamik suliaqarneq pillugu paasissutissat kingulliit, nunarsuarmi anguniakkanik pisortatigoortumik nutsikkat, ilusilersuutit il.il. aaneqarsinnaasut nassaarisinnaavatit. Nittartagaq Aningaasaqarnermut Naalakkersuisoqarfimmi Nunamik pilersaarusiornermut immikkoortortaqarfimmit ineriartortinneqarpoq aamma aaqqissuunneqarluni, qitiusumik piujuartitsilluni ineriartortitsinissamut sulianik ataqatigiissaarineq Namminersorlutik Oqartussanit akisussaaffigineqarluni.
Nunarsuarmi anguniakkanut akunniffik taanna nutaaq innuttaasut, aaqqissuussat, suliffeqarfiit aamma pisortaqarfiit piujuartitsinermik pilersitsillutik naammassinnittut pillugit paasissutissanik nutaarsiassiisarpoq – kisianni aammattaaq nunami anguniagaqarnermi aporfiusinnaasut pillugit. Nittartagaq akunniffiuvoq Nunarsuarmi anguniakkanik atuerusuttunut, imaakkaluarpat nammineq inuunermut, atuarfimmut imaluunniit suliffeqarfimmut, naammassisatsinnik, assersuutinik aamma tamanut atortunik soqutiginarsinnaasunik katersuivik. Nunap innuttaasuinut anguniakkanik ilisimasaqalernissamut ajornanngitsumik paasiniaasinnaaneq pilersinniarparput, aamma sumiiffimmi, kommunini nunallu iluani soqutiginartumik kinguneqartitserusulluta.
Anguniakkavut.gl Danmarks Statistik-ip Kalaallit Nunaata SDG suussusersiutaanik ineriartortitsinissaanut aamma siumut ingerlaneranut ikorfartuinissaanut qallunaat aningaasaqarnikkut inatsisaannit aningaasaliiffigineqarsimavoq. Qupperneq taamaalilluni SDG 2030 agendamik ingerlatseqqinnissaa ikorfartorpaa, nunarsuarmi aamma nunap iluani SDG 2030 suussusersiutinik saqqummiinermigut, taakku siunissami nunat akornanni ineriartornermut naleqqiussinissaq periarfissanngortillugu.