Royal Arctic Linep piujuartitsilluni ineriartortitsinissaq suleqataaffigaa
Umiarsuaatileqatigiiffiup piujuartitsilluni ineriartortitsinermik suliaqarnera CO2-millu aniatitsinerup annikillisarnissaanik ukkataqarnera ingerlatseqatigiiffiup 2020-mut CSR pillugu nalunaarusiaani allaaserineqarpoq.
Nalunaarusiaq uani atuaruk (KAL)
Royal Arctic Linep allanngortiterineq annertooq 2015-imiilli ingerlappaa, umiarsuaatileqatigiiffiup nalitsinnut tulluussarnissaa siunissamullu qulakkeernissaa siunertaralugu aammalu assigiissaarinerit umiarsuaatiminillu nutarterineq aqqutigalugit assigiinngitsutigut suleqateqarsinnaajumalluni.
IT-kkut systemit taarsersorneqarput, suleqatigiinnissamik isumaqatigiissusiortoqarpoq assartuussinikkullu nutaamik ilusiliisoqarneratigut sullitavut umiarsualiviit amerlanerusut nunani tamalaani amerlanerusunik attaveqartut aqqutigalugit niuernissaminnut periarfissaqalerput. Niuernikkut iliuusissatut pilersaarut maanna patajaallisarneqarpoq, suleriaatsit attaveqarfiillu tamakkiisumik suleqatigiissinnaanissaat allanngortitsinerullu ingerlatseqatigiiffimmut sullitaanullu nalittorsaasinnaanissaa qulakkeerniarlugu.
Pigisat atorluarnerunissaat
Islandimiut umiarsuaatileqatigiiffiannik Eimskipimik suleqateqalernerup malitsigisaanik Islandip, Nunatta Skandinaviallu akornanni nassiussat assartornissaannut umiarsuit angisuut pingasut atorneqalerput mikinerusut amerlanerusullu atorunnaarlugit. Taamaaliornikkut containerimut nuussamut ataatsimut CO2-mik aniatitsineq annikillineqarpoq. Annertuumik ingerlatsinermi iluaqutissartaasut, suleqatigiinnermi tunngaviusut, taamatut iluaqutissartaqartitsipput.
Nassiussat assartorneqartut amerlassusaasa ukiup qanoq ilinerani allanngorartarnerat pigisanik atorluaanissamut aamma sunniuteqartarput, taamatullu aamma containerimut nuussamut ataatsimut CO2-mik aniatitsinermut. Ingerlaarfik nutaaq ukiup qanoq ilinerani allanngorartoqartarnerata iliuuseqarfiginissaanut periarfissaqalersitsivoq. Piffissaq ulapiffiunerpaasartoq tassaanerusarpoq juunimit novembarimut, piffissarlu ulapiffiunnginnerpaasartoq tassaalluni decembarimit maajimut. Kalaallit Nunaata Danmarkillu akornanni siornatigut ingerlaarfiusumi naammassisaqarsinnaassuseq anginerusoq atorluarneqarsinnaasimanngilaq, ingerlaarfimmilu nutaami umiarsualiviit amerlanerusut aqqusaartalernerisigut tamanna maanna periarfissaalerpoq.
Royal Arctic Linep DHL Global Forwarding suleqatigiinnissamik 2020-mi isumaqatigiissuteqarfigaa. Niuernikkut suliaqarfiit annertusarnissaat siunertarineqarpoq, piffissamilu ulapinnginnerpaaffiusumi naammassisaqarsinnaassuseqarpallaarnerup, kiisalu ingerlaarfimmi naammassisaqarsinnaassuseqarpallaarnerup atorluarneqarnerata annertusarnissaa, pingaartumik kujammut ingerlaarfinni, nioqqutissat eqqussorneqartut annissorneqartullu annertussusaasa assigiinngissuteqarnerat pissutigalugu. Ataatsimut suliniuteqarnerup 2021-mit atorluaanikkut malunnaatilimmik pitsanngoriaateqartitsinissaa naatsorsuutigineqarpoq, taamatullu aamma aningaasarsiornerup annertunerulersinnissaanut.
Ilisimatusarneq tunngavigalugu ineriartortitsineq
Naammassisaqarsinnaassutsip pioreersup tamakkiisumik atorluarneqarneranut uiggiullugu usit sapinngisamik minnerpaamik orsussamik atuilluni assartorneqartussaapput. Taamaammat Royal Arctic Linep Frugal Technologies aamma motooriliorfik MAN suleqatiginissaannik isumaqatigiissusiorfigai, misileraatitut Malik Arcticami teknologiimik nutaamik ikkussisoqarluni. Teknologii nutaajuvoq patenteqarfigineqartoq motoorimillu nammineerluni aqutsisinnaalluni on-top-systemiuvoq patenteqarfigisaq nutaaq akuerisaasoq umiarsuullu orsussamik atuineranik annikillisitsisinnaalluni.
Orsussamik atuinermi agguaqatigiissillugu sipaarutaasoq 10-15%-it missaanniippoq, Malik Arcticamullu tunngatillugu Danmarkip Nunattalu akornanni ingerlaarfimmi isorartoorsuarmi ulloq unnuarlu orsussamik 3-4 tonsinik sipaaruteqartitsisarluni.
Frugal Propulsion aqutsinermut systemiuvoq nammineersinnaallunilu ilinniartartoq malussaatit, Big Datat aamma algoritmet nutaaliaalluinnartut atorlugit umiarsuup maskiinaa itsinertussutsimut, usinut, mallinut anorimullu naleqqussartuarlugu. Systemi orsussanut tamanut atorneqarsinnaammat Royal Arctic Linep teknologiip pineqartup umiarsuaatimini allani atorneqarsinnaanera periarfissaasutut isigaa. Teknologii ineriartornerup pitsaanerusumut ingerlariaqqinnissaanut maannakkorpiaq atorneqarsinnaavoq taamaalillunilu imaatigut assartuinermik suliaqarfiup 2050 angutinnagu tonsimut assartorneqartumut CO2-mik aniatitsinerup 70%-inik annikillisinnissaanut aamma iluaqutaasinnaalluni.