Ilulissani ullut avatangiisileriffiusut: Avatangiisip eqqaaviunnginnera eqqumaffigisariaqarparput.

Ulluni 4-8 oktober Ilulissani ukiumoortumik avatangiisileriffittut ullorsiortoqarpoq. Siunissami eqqagassalerineq oqaluuserisassani pingaarnerpaatinneqarpoq, Jakob Kofodili malillugu Kommuneqarfik Sermersuumi avatangiisinut immikkoortoqarfimmi aqutsisuusoq, pingaaruteqarpoq eqqaamassallugu avatangiisitsinnik eqqarsaraangatta eqqagassanik eqqarsannginnissarput, tassanilu eqqagassalerinerit aamma eqqarsaatigineqarput. Tamanna sumiiffinni arlalinni ajornartorsiutaagaluartorluunniit.

Ukiumoortumik avatangiisileriffittut ulloqarfinni sammisani eqqagassalerineq oqaluuserisassani pingaarnerpaavoq. Saqqummiussami uani ulluni taakkunani pingasuni sammisat suut sammineqarsimanersut qanorlu inerniliisoqarsimanersoq atuarsinnaavat.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup aalisarnermi atortunik annaasanik qimaanarneqarsimasunillu qalluinerit pillugit periusissiaminnik saqqummiipput. ESANI A/S Nuummi Sisimiunilu ikuallaavittaat pillugit killiffinnik saqqummiipput kiisalu qaammatini kingullerni eqqagassalerinermi angalanerit pillugit saqqummiillutik. Kalaallit Nunaanni utertitsisarnermik aaqqissuussinermik ineriartortitsinermut tunngatillugu suliniutinik aallartisarneqartunik tamatumunngalu Nuuk Imerminngaanneersunit allaanernik puulinnik ilanngussinissaq pillugu saqqummiussipput.  DTU-mi lektori Pernille Erland Jensen Kalaallit Nunaanni anartarfilerinermut tunngasunik aaqqiissutissanut misilittakkanik periarfissanillu katersaqarnissaq pillugu pilersaarummik saqqummiussivoq.

Taakkua saniatigut kommuninit saqqummiisoqarpoq. Kommunip Kujalliup ilaatigut eqqagassanut poortuinermut atortorissaarut pillugu oqaluttuarput. Qeqqata Kommunianit eqqagassanut ikuallatassanut malinnaasinnaannginnermik ajornartorsiuteqarnertik pillugu saqqummiipput. Avannaata Kommunianit saqqummiinermi pingaarnertut Ilulissani eqqaavittaami torersaaleruttorneq pineqarpoq. Kommune Qeqertalimmit eqqagassalerinermi suliassat pillugit saqqummiisoqarpoq.

Kommuneqarfik Sermersuumit kommunimi eqqagassalerinermut pilersaarutiminnik tamatumunngalu suleriusissat aningaasaqarnerlu saqqummiunneqarput. Tassani ilaatigut NP-ip Nunarsuarmi Anguniagai eqqagassalerinermi tunngavigalugit anguniakkanik nalilersuisoqarpoq taamaasilluni avatangiisilerinermi kiisalu piujuartitsinermi suliniuteqarnermut anguniakkanut piviusunngortitsinissamut sakkugineqarlutik. Tassunga ilanngullugu Tasiilami Ittoqqortoormiunilu sumiiffimmi aqutsisut najukkaminni immikkut unammillernartissinnaassaminnut aaqqiissutinik ujartuisumik eqqagassalerinermik suliaqartarnertik pillugu saqqummiussipput. 2023-mi Ittoqqortoormiini BioCo Techimit atortorissaarummik nerisakunit naggorissaasiornissamik misileraasoqassaaq.

Ullut pingajussaani kingullermilu nalilersuisoqarpoq. Sammisatut oqallisigineqartutuaq tassaavoq, avatangiisip eqqaaviunnginnera. Jakob Kofodip avatangiisinut ulloqartitsinermi eqqagassaleriniinnarmik sammisaqarnerit peqqutaallutik avatangiisinut piujuartitsinissamullu tunngasunik sammisanik allanik soqutiginarsinnaasunik saqqummiussaqartoqannginneranik uggorinninnini naqissuserpaa. Tassunga tunngatillugu itisiliivoq:

“Avatangiisinut ulloqartitsinissat sioqqullugit aalajangersimasunik erseqqarissunillu suliakkiisoqarsinnaavoq 'kommuninit tamanit saqqummiisoqartitsiinnarnani'. Naggasiulluguttaaq, avatangiisinut ulloqartitsinermi eqqagassaleriniinnaq pinnagu allanik eqqartuisoqarsinnaavoq. Sumiiffinni arlalinni ajornartorsiutaagaluartoq. Kommunini silaannaap allanngoriartornera pillugu periusissiornissaq naleqqutissagaluarpoq. Nunap iluaneersunik ikummatissanik atuinerujussuaq qanoq iliuuseqarfigisinnaavarput apeqqutissallu allat tassunga attuumassuteqarsinnaasut eqqartorneqarsinnaapput.”